काठमाण्डौ २२ भदाै / बलिउडका चर्चित अभिनेता नवाजुद्दीन सिद्दीकी नेपाल आइपुगेका छन् । नेपाली फिल्म ‘शाम्बाला’को प्रिमियरमा सहभागी हुन उनी शनिबार दिउँसो काठमाडौंमा अवतरण गरेका हुन्।

त्रिभुवन अन्तर्राष्ट्रिय विमानस्थलमा ओर्लिने बित्तिकै उनी सेल्फी खिच्ने र अटोग्राफ लिने फ्यानहरुबाट घेरिएका थिए । उनी बलिउडमा निकै चर्चित छन् । उनको शान्त क्यारेक्टर र जादूमयी अभिनयले जो कोहीलाई आकर्षण गर्छ । उनका कैयौं फिल्म हिट छन् । नेपालमा पनि उनका हजारौं फ्यान छन् ।

मीनबहादुर भामको निर्देशनमा बनेको फिल्म ‘शाम्बाला’को नेपाल प्रिमियर भदौ २३ अर्थात् आइतबार काठमाडौँमा हुँदैछ । चलचित्र टोलीका अनुसार निर्देशक भाम र नवाजुद्दीनको पहिलो भेट बर्लिन फिल्म फेस्टिभलमा भएको थियो । त्यहाँ नवाजुद्दिनले ‘शाम्बाला’ हेरेका थिए र नेपालमा पनि प्रिमियर हेर्ने इच्छा व्यक्त गरेका थिए। सोहीअनुसार उनी आज नेपाल आइपुगेका हुन् । उनले नेपाली फिल्ममा काम गर्ने इच्छा पनि देखाएका छन् । हुन त उनी नयाँ निर्देशक र नयाँ निर्मातासँग काम गर्न रूचाउँछन्।